CAN WOI DIK MT:

睇完你篇blog加上最近見你，都知道你好擔心，我都有感而發， 好想寫返小小所謂"過來人"既感受。。。

一般來講你係患左交論文及答辯前焦慮症，不過有得醫既。首先，同大家分析下各項讀緊phd既時候壓力仔既來源，同埋自我安慰既方法（in blue）：

只係得一個來源－－－－＞就係人既問題！無錯！其實只係得人！

老細：有好多種，不過我地遇過既都係過份positive既，所以就開始懷疑係咪真係咁得勒。
（你老細咁有責任感你就應該信佢啦！佢話你得咪得囉。不過咁，老細雖然已經好熟好熟我地份野，始終唔係好似我地自己咁日日夜夜對住，所以，真係唔放心既咪自己睇多幾次囉。。。最緊要諗定多D問題同老細一齊諗下點應付囉）

同學：唔知你有冇，見住一個又一個考完又過埋，真係有點沮喪。
（o拿我初初就覺得，車話之人地點呀最緊要顧掂自己，不過呢，有機會既話同多D同depto既過來人傾下，起碼知道個基本過程係點同埋有咩要注意呀嘛， 仲有了解下你間學校個考試"傳統"呀嘛。。。雖然你都大概聽講過，但係知道多少少近期考生既親身經歷，真係定好多架！）

朋友 － o拿呢個真係要講講。。。朋友基本上係好支持既。不過呢，都會為我地帶來多少壓力仔o既：可以分為幾類：

冇讀過phd既正常人（係我一向都覺得我地怪！）： 有時見到佢地咁開心，就覺得，究竟我做咩要咁辛苦？人地做左成十年野啦，我呢？都係離唔開呢個圈喎。。。冇鬼用！
(圈外人其實好難明白我地既諗法o既，因為事實上呢條路係又長又遠而寫文一定係孤軍作戰。不過，有時諗，我地做既野到冇乜特別呀，都係為左個career鋪路，只不過條路長少少乍嘛，同埋份工麻煩係要人囉埋個degree乍嘛，唔通你覺得你唔讀phd唔寫呢份論文就唔識得做研究唔識得係大學教書咩？返到工咪又係有公司有老細有客有怪人。。。)

讀緊同自己差不多進度：久唔久會聽到人地話，今日寫左幾多幾多，但係自己嘔極都嘔唔出o既時候，就覺得好難過。
（諗乜鬼呀，寫啦！）

有讀過兼有份正職：呢類就梗係羨慕同埋得個恨字啦，唔係一定想做同果個人一樣咁既野，而係，好心急想完成呢個階段跳去下一個階段。
（諗乜鬼呀，寫啦！）

家人 － 基本上係好支持我o既 ，實際就唔多唔少都覺得我地多餘架喇 ，最好快手番來做野搵錢。不過自己最擔心都係番來無野做仲要靠屋企就真係唔掂。
（不過呢樣野你都叫做解決左啦。）

最大既敵人：自己：一般係交文前幾個月，就無無謂謂開始搵野黎驚，未交驚寫唔切啦，交唔切啦，驚冇靈感啦，交左驚考試比人插，驚唔識答辯， 驚唔比你過，驚要改好多。。等等。。。
（係 你老細同考官眼中，我地只係初出茅蘆既死靚妹，做咩要整死你唧？改咪改囉使死 － 以你既質素， 想唔過，係好難架喎，老細叫得你交就唔會老點你既！比信心自己既同時都要比信心你老細！一定得架！至於時間方面，係幾緊迫既，但係我覺得大吉利是真係要遲 既，都唔會太過份影響你既工作姐。唔死得既！係都係第一年姐。。。就唔到都冇計架！呢一刻最緊要儘快搞掂你篇文！）

集合以上咁多點，你話成個過程好容易好開心就真係冇可能啦，喊我梗係試過啦，但係擔心真係好正常喎。通常都係唔諗就冇野，越諗越多無謂野，咁咪會谷到爆囉。

我唔係好識安慰人呀，不過我好明白你依家o既感覺喎，冇問題喎。。。，你唔擔心我反而覺得奇怪喎！哈！不過，有時都覺得自己囉黎煩既，有幾多個人真係會唔過？ 我好相信輪都未輪都我地啦。。。唔係話講風涼說話，不過我覺得唔好少少既自信都冇埋先得架。。。

無論咩事情都係，有時轉下心理狀況就完全唔同晒！唔好諗到件事咁大啦，超，phd乍嘛，有咩風浪未見過，況且你先係你篇文既expert！考官問你問題唔一定係你篇野有問題喎，而係佢地真係有問題喎，想你親自解釋下姐，你真係答唔到既， 就真係同你份野冇乜關係架啦！！話明係defence，就不妨defensive少少！waakakakaka...

再諗下，就黎可以返屋企喇喎！好野！
JDDDDDDDDDDDDDDDDDDDDDDDDDDDDDDDDDD....係呀，搞掂左又係一條好漢。驚就兩份！

WO DANG LEI FAAN LEI SI BL KWAN AA!!!

－－－－－
今日有個學生問我一個極度死樣既問題：
佢："呀其實你覺得，讀phd有冇用呢？"
〔心諗："冇架！不過我鍾意呀！你理我呀！"（其實我地就係呢種心態！）〕